همت العزازي. ..خبيرة إرشاد نفسى
لو إبنك أو بنتك ملوش أصحاب..لو مش عارف إزاى يصاحب،لو كمان معندوش القدرة يتعامل مع حد ..منطوى ومبغوض من أصحابه ،يبقى أعرف إن ده موضوع نفسى إسمه”النبذ الإجتماعى”
وعلشان تقدروا تعرفوا وتفهموا موضوع” النبذ الإجتماعى” خليكوا معايا. ..
نخلص الحوار ده فى ثلاث كلمات”الأعراض ،الأسباب،العلاج”
أولا بالنسبة للأعراض. .النبذ زى أى مرض نفسى له أعراضه منها النفسى،زى المعاناة من القلق،والسلوك العدوانى،والإنطواء ومخاطر التدخين
ومنها الجسمى،زى إضطرابات القلب والأوعية الدموية
ثانيا الأسباب:
أى طفل عادى إنه لما يخرج من زمام الوالدين للروضة والمدرسة بيكون عنده القدرة يكون أصحاب بفعل الفطرة الإنسانية الطبيعية
طيب لو الطفل ده مش قادر يصاحب. .هل ممكن نعلمه يصاحب إزاى، ويتحب إزاى…؟؟
أكيد نقدر. .لو عرفنا الأسباب
طيب إيه هى بقى أسباب “النبذ الإجتماعى”
قد يكون السبب هو سلوك الطفل نفسه ،وإتصافه بالعدوانية،والمشاكسة،والإنطواءية والخجل……وقد يكون السبب حضرتك “الأم أو الأب”…إزاى ده..؟؟
-لما تشعلل نار الغيرة والمنافسة الغير البناءة بينه وبين أصحابه -لما توبخه لو محققش النجاح والتفوق عليهم
-لما حضرتك تدفعه إنه يبقى منافس عليهم فى مجالات إبنك معندوش موهبه فيها. .ولأنه مش ح يقدر يحقق ده بيكون الكره للمنافسين
-أكبر غلط كمان لما تميز إبنك عن أصحابه،لما تدى لإبنك ألعاب غاليه، ولبس فخم،ودهب وموبيل، ومصروف،وغيره من زمايله ميملكوش الحاجات دى
ثالثا إزاى بقى نعالج حوار” النبذ الإجتماعى “ده ويكون طفلك محبوب وعنده أصحاب كتير
“إليزابيث برنستين”خلصت لنا الحوار ده فى كلمتين نشرتهم فى صحيفة أمريكية، قالت:إن بعض الأشخاص لهم قدرة قوية على تكوين الصداقات، ولهذا السبب بيعيشوا فى سعادة وصحة جيدة،وعمر طويل
لأن الصداقة بتخفض ضغط الدم،والضغط النفسى،وتقلل فرص الإصابة بالإكتآب. .وتقول “إليزابيث “إن هناك عدة خطوات لبدأ الصداقة :
*لا تضع حدود لنفسك فى التعامل مع من مثلك
*لا تتوقع أكثر مما ينبغى من الصداقة فى وقت قريب
*كن منفتح وشاركهم أخبارك أكتر
وختاما لكلمات “إليزابيث ” أقدر ألخلص لكم أفضل طريقة لعلاج مشكلة النبذ
علشان إبنك يكون محبوب ويكون أصحاب
_صاحب وصاحبى ولادكم. .إفتكر إنك أحق الناس بصداقة عيالكم، والعلاقات بينكم تكون قوية ونزود الثقة والتفاهم حبتين
_خد رأيه في كل حاجة مناسبة لسنه، وشاركه فى الرأى،وعززه على الرأى الصح،بكدة حتزود ثقته بنفسه
_إسمعه كويس قوى…وعززه كتير حتى لو بحتة شيكولاته
_وفرله بيئة اجتماعية، عرفه على أطفال فى سنه، وعلمه يتعامل معاهم إزاى،إعرف إهتماماته وهواياته،وإشركه فى أنشطة مناسبة،وعلمه شوية مهارات بطريقة اللعب،زى العدل والمشاركة،إزاى يقبل الهزيمة فى اللعب بروح رياضية،بلاش العكبسة، خليه يهنى زميله اللى فايز،ويحترم مشاعر الآخرين
_كون سكرتيرته وسكرتيره الخاص،نظم وقته،للعب،والمذاكرة،وتمارين السباحة، ….
_إقبل أصحابه اللى هو يختارهم من غير نقد وبلاش اللى تختارله ،علشان يقدر يفرق بين الحلو والوحش،ويبقى عنده خبرة إنه يتعامل مع الآخرين
-بلاش بقى المقارنة، وإبن فلان أحسن منك، وأنت أحسن من إبن فلان
_إفتخر بإبنك وحبه بعيوبه علشان هو إبنك،شجع صفاته الحلوة
عرفه كمان إن مفيش حد أحسن من حد،وكل واحد وله صفاته
_إنزل المدرسة وإسأل مدرسيه، أخبار سلوكه إيه؟ ؟متعاون مع أصحابه، منطوى،إعرف أصحابه ونسق معاهم وقت للعب وممارسة الهوايات
وأخيرا خليك قدوة حسنة لإبنك وبنتك، خليه يراقب ويشوف مش صداقتك بس لأ، كمان وصفك لصفات أصحابك الحميدة، وإحترامك وتقديرك لصفاتهم، ويشوف بعينه المواقف اللى وقعت فيها،وأصحابك اللى أنقذوك،ووقفوا جنبك
