كتبت الاستاذه / نهي ابو الرواش
كثير كنت باستغرب إن حالات من الجفاء و الطلاق ممكن تحدث بعد ١٠ سنوات أو أكثر وأقول ليه دة حدث بعد فترة طويلة كده ؟؟ و إن أصدقاء العمر ممكن يقاطعوا بعض وميعرفوش بعض تاني ؟؟ و كمان عدم تواصل زملاء العمل و الأقارب و الجيران و و و …. وبعدين توصلت لحقيقه الأمر .. إن في كل علاقاتنا موجود رصيد لتلك العلاقة أياً ما كانت تلك العلاقة .. كل واحد بيحدد رصيد للثاني .. الرصيد ده بيكون علي حسب معَزة الشخص عندنا .. وفي كل تعامل محترم و راقى .. الرصيد بيزيد .. ولو التعامل مش ظريف الرصيد بيقل .. ومع إحساس البعض بإننا بنحبهم بيتمادوا في التصرفات الغير مُرضية ومابيعرفوش إنهم بيسحبوا من رصيد العشم والمحبة والعشرة التى لدينا لهم .. وبيعتقدوا إن رصيد تسامحنا لهم مُمتد بلا نهاية .. وتستمر العلاقة إلي أن ينفُذ الرصيد و يصبح صفر .. لكن فيه حالات إستثنائية بنقرر فيها شحن الرصيد تاني علشان العشرة ونضطر أن نغفر لهم أخطاءهم و نكبر دماغنا .. إلى أن يتمادي الشخص الآخر في إستغلال الود والعشرة ليصبح الرصيد صفر مرة أخرى .. وهنا تنتهى قدرتنا على تحمل المزيد منهم .. بعدها يصبح القرار بقطع العلاقه بدون ندم أو تراجع أسلم قرار ..
حافظوا على العلاقات و على الناس اللى بتغفر و بتفوت وماتعتقدوش إن الزمن والعشرة كافيين لشحن الرصيد .. لأ .. رصيدك بيزيد بالمودة وحُسن الخلق و حافظوا على الناس اللي بتحب بجد وتغفر وتسامح حفاظًا على بقاء العشرة .
نهى ابو الرواش..
