أخيرا شركة سوني أعلنت عن شكل جهاز بلايستيشن 5 الجديد، ناس كتير كانت منتظرة تعرف التفاصيل لكن يا خسارة، وهقولكم طبعا ليه بقول يا خسارة، بس خلونا نتكلم عن الحاجات اللي تم الإعلان عنها رسميا.
شكل PlayStation 5 جديد ومختلف، وممكن يتحط على المكتب بالطول أو بالعرض، الأسطح العريضة باللون الأبيض، والإطار الدائري بييجي باللون الأسود مع إضاءة زرقا مميزة.
الجهاز نازل بنسختين، واحدة فيها مكان للأسطوانات، والتانية مفيهاش مكان للأسطوانات، ودي هتبقى digital edition يعني تقدر تستخدمها في اللعب أونلاين من خلال الأكاونت بتاعك.
نتكلم بقى عن إمكانيات جهاز PlayStation 5
الجهاز بيشتغل ببروسيسور AMD zen 2 بسرعة 3.5 جيجاهرتز، وبيضم معالج رسوميات AMD RDNA 2 بقوة 10.28 تيرافلوب وده بيخلي الجهاز يشغل ألعاب فيها جرافيكس عالي جدا، الرامات 16 جيجا بسرعة 256 بت، والهارد NVMe SSD بمساحة 825 جيجابايت فائق السرعة في نقل البيانات وممكن ينقل 5 جيجا في الثانية، وأخيرا مشغل الأقراص الضوئية Blu ray بدقة 4K حتى 120 إطار في الثانية، وكمان بيدعم 8K.
الكلام الكبير ده معناه إننا قدام جهاز قوي وسريع جدااا.
ذراع التحكم هتبقى جديدة وكمان اختاروا ليها اسم جديد وهو Dualsense بدلا من Dualshock اللي كان في بلايستيشن 4، أكبر ميزة فيه إن مدمج به سماعات ومايك يعني مش هتحتاج لسماعات خارجية، وطبعا من خلال السماعة دي تقدر تتكلم مع أصحابك اللي بتلعب معاهم أونلاين وكمان تسمعهم بوضوح، وكمان تعديل الذراع بتخليه مريح أكثر لليد، وكمان زرار Share اسمه اتغير بقى Create.
خلصنا المواصفات ودلوقتي عاوزين نعرف موعد الطرح في الأسواق والسعررررر.. والحاجتين دول هما سبب إني قولت في الأول يا خسارة.. لأن سوني مقالتش موعد الطرح الرسمي ولا قالت السعر الرسمي، لكنها اكتفت إنها تقول جهاز PlayStation 5 هينزل في عطلة 2020، يعني ممكن ننتظر طرحه في الأسواق من أول أكتوبر لحد ديسمبر.
السعر كمان للأسف لم يتم الإعلان عنه رسميا، لكن أغلب التكهنات بتقول إنه ما بين 500 إلى 700 دولار.
السؤال المهم دلوقتي: أشتري PlayStation 5 ولا اكس بوكس series x الجديد؟
الحقيقة المواصفات الخاصة بالأداء تقريبا متقاربة جداا، لكن اكس بوكس أقوى في حتة الجرافيكس، لكن بلايستيشن أسرع شوية، لكن الفروق مش كبيرة أوي يعني.
علشان كده بنصحكم ننتظر طرح الجهازين بالأسواق، وكمان لازم نشوف السعر هيكون متقارب ولا في فرق كبير، والحاجة اللي هتفرق بقى هي الألعاب، لأن طبعا إحنا عارفين إن في ألعاب بتنزل حصريا لبلايستيشن وبرضه ألعاب بتنزل حصريا لإكس بوكس، فطبعا هتشوف أنت بتحب إيه أكتر.
يبقى خلونا نستنى
