متسامحش لو…
– حد شوّهك نفسيّاً ؛ حد كان بيخطط لتدميرك من الداخل واستخدم معاك كافّة الأسلحة التحطيمية و فعلا نجح إنه يعمل كده فيك ..نجح في إنّه يوجعك ويندّمك على كل حلو إنت قدّمته له في يوم من الأيام ..
– حد دخّلك في حرب إستنزاف مع نفسك و جرّح في كبريائك و قللّ مِنّك على المدى البعيد والقريب وانت كنت بِـ تبررّ له تصرفاته بإستمرار على سبيل السهو منُّه مش عمد ..
– حدّ اغتالك في قلبك ..وحوّل حُبّك لِـ حبْل مشنقة يخليك تخنق نفسك بنفسك ؛ حد ما رحمش ” طِيبتك ” ولا كان شايف “معدنك كويس ”
..كان شايف حُبّك له “ضَـعْف ” مش قوّة .. – حد استغل عطفك وعاطفتك في صالح خياله المريض لأنه أبعد من أنه يعرف يحب وأبعد من إن ربنا يكرمه بنعمة الحُب في حياته..” هو حد مُشوّه في إحساسه وبالتالي عاوز ينشر فيرس الكراهية حواليه ” وبس
– حد ما بتلاقيهوش إلاّ لمّا تسوّد الدنيا قُدّامه و بيلجأ لك كَـ عُكّاز له
..وفي أول لحظات وهن و سقوط لك بيكون آخر السائلين عنك وآخر حد ممكن يفتكرك ..و لو سأل ..سؤاله بيكون باهت و بارد و منزوع منهّ القلق والخوف عليك و الزعل عشانك بيكون شبه معدوم …
– حدّ غُروره عامي عينه عن عيوبه اللى بدأت تتفاقم حد النُخاع … غروره وغطرسته اللى بيدمّر بيها نفسه قبل ما يدمّر غيره … ده الحد المريض بِـ كِبره ..اللى ممكن يوصّلك لمرحلة إنك تشك في قُدراتك ،تشك حتى في حُسن نيّتك تجاهه …تبقى مش عارف إنت صح ولا هو الليّ مجنون .. ؛بِـ يندّمك على طِيبتك معاه و عفوك له …ده أكتر إنسان يستاهل الشفقة لأنهّ شايف إن التعالي على الناس ” صَنعة ” و ذكاوة …و في الواقع بيكون أغبى خلق الله خُلقاً و فِعلاً …
وفي النهاية لازم تعرف إن الأنواع دي اللي بتقابلهم في حياتك هُم ” وباءات ” مش بس ” إبتلاءات ” ..وباء و منتشر جداً ….بس انت اللي بتسمح بإنتشاره من البداية لما بتمنحه حجم أكبر من حجمه ….وبالتالي هو عشان صغير في عين نفسه ..فأنت بطيبتك بتصنع منه شئ وهو في الحقيقة ” لا شئ ” …
الأنواع دي ما ينفعش نسامحهم لأن كل ما هتسامحهم هينتشروا أكتر وأكتر ومش هنخلص من كم المرضى اللى بقينا عايشين معاهم ….وكأنهم طاعون حالف ما يسيب مكان وإلا يدمّره ….
ما تسيبش حد يشوّهك ..
ما تسامحش حد بيتعمّد يوجعك..
ما تسمحش لحد مُعاق فِكرياً إنه يستفزّ براءاتك أو يشكّلك على هواه ..
