كتب : ماهر بدر
لم تكل جهدا ولا بحثا علميا ولا تتمهل في تحقيق التنمية الزراعية التي تحقق التنمية المستدامة لمصرنا الحبيبة
انها الخبيرة الدكتورة دينا المنزلاوي والتي تقود مبادرة للقضاء على سوسة النخيل بمزارع النخيل في مصر فهي تتحرك في كل المحافظات التي بها مزارع نخيل مثل الجيزة او الوادي الجديد بالتعاون مع وزارة الزراعة للحفاظ علي ثروة مصر من النخيل
و قد اوجزت خطوات للتعرف وكيفية القضاء عليها
ايه هي سوسة النخيل ؟
سوسة النخيل حشرة شديدة الخطورة علي النخيل تضع بيضها في المناطق المجروحة او الغضة في النخيل يفقس البيض ليرقات ، تبدأ اليرقات في التغذية علي أنسجة النخلة ثم تتحول الي عذاري ثم حشرات كاملة تتزاوج لتعيد دورة الحياة مرة اخري .
طيب ازاي اعرف ان النخلة مصابة ؟
فيه علامات ظاهرة للإصابات الشديدة زي وجود افرازات صمغية لونها بني داكن ولها رائحة عفونه كمان وجود نشارة خشب مكان تغذية اليرقات وملاحظة ثقوب في قواعد الجريد كمان قلب الفسايل لونه اصفر وسهل النزع باليد مشاهدة اطوار الحشرة وجود تجويف في النخلة وفي النهاية جفاف الاوراق وميل القمة النامية وموت النخلة .
بس طبعا دي اصابات شديدة ونسبة الشفاء منها ضعيفة علشان كدة مهم نكتشف الإصابة بدري ليتم الشفاء التام علشان كدة بننصح بالكشف الدوري بإستخدام احد الوسائل العلمية المناسبة لكل حاله بالكشف الصوتي او التصوير الحراري او البصمة الوراثية او بإستخدام الكلاب المدربة .
طيب انا أكتشفت الإصابة ازاي اعالجها ؟
مهم جدا انك تعرف خطورة المبيدات الكيماوية وانك بتأذي نفسك وعيالك الي هياكلوا البلح المتشبع بالمبيد ربنا يعافينا واياكم من شر الامراض ، مش بس كدة دا الحشرة كمان مبقتش بتتأثر بالمبيد وبقت بتقاومه يعني صرفت فلوسك علي الفاضي والسوسة بتاكل في رزقك ورزق عيالك . علشان كدة بننصحك بإستخدام المركبات العضوية والحيوية علشان تقضي علي السوسة وتحافظ علي مصدر رزقك وتحمي صحتك وصحة اولادك .
ازاي بقي هوصل المركب ده لمكان الاصابة ؟
الطريقة الشائعة هي الحقن اليدوي بعمل مجموعة ثقوب حول مكان الاصابة ووضع مواسير تملئ بالمبيد العديد من المرات حتي تمام الشفاء بس الطريقة دي محتاجة مجهود كبير ووقت طويل ونتائجها ضعيفة لانها بتعتمد علي الحقن في نقطه محددة فلا تتيح امكانية انتشار المبيد حول منطقة الحقن بالشكل المطلوب وخاصة ان اليرقات تتحرك في جميع الإتجاهات وبالتالي الطريقة دي غير مجدية .
علشان كدة بننصح بإستخدام جهاز الحقن تحت ضغط حيث يضمن انتشار المبيد في جميع الاتجاهات وكمان بتوفر الوقت والجهد والتكاليف ونتائجها ممتازة .
يعني انا لو استخدمت المبيد المناسب وجهاز الحقن اكون كدا عالجت النخل وإطمنت علي المحصول ؟
احنا فعلا كده هنكون نجحنا في مكافحة السوسة بس خلي بالك الي يتعامل مع النخلة يكون عنده خبرة كبيرة علشان تحمي قلب النخلة وتقفل مكان الثقوب بطين او رمل او اسمنت بس الأهم من كده لازم تاخد بالك علشان الإصابة مترجعش تاني
اعمل اية علشان امنع الاصابات الجديدة ؟
هنتبع نظام المكافحة المتكاملة بالكشف الدوري علي النخيل وهنحصر النخيل المصاب والنخيل السليم والنخيل الذي يمكن علاجة والنخيل الذي يتم قلعة والتخلص منه وذلك لمتابعة مدي انتشار الحشرة ومدي نجاح المكافحة واتباع الرش الوقائي لجميع النخيل بطريقة الغمر من القمة للقاعدة ثم علاج كل نخلة مصابة بالطريقة المناسبة لها .
كمان مهم جدا الاهتمام بالعمليات الزراعية لانها بتحد من الاصابة مهم التسميد والري المعتدل ، وبعد التقليم يكون للجريد الجاف والمصاب فقط ورش النخيل بعد التقليم وفصل الفسائل باحد المبيدات الموصي بها وغمر الفسائل بالمبيد بمعدل 3 في الالف قبل نقلها للزراعة وتجنب نقل الفسائل من والي المزرعة الا بعد التأكد من خلوها من الإصابة ، وازالة النخيل المصاب ودفنه في حفرة متر ويسكب عليها كيروسين بمعدل 3 سم مبيد لكل لتر كيروسين .
مش بس كدة هنستخدم مصايد فرمونية كرمونية لإصطياد الحشرات من الذكور والإناث وذلك للتخلص منها والتنبؤ بالإصابة بمعدل مصيدة لكل فدان في الاصابات الشديدة .
إيه دور المبادرة بقي انا اخدت كل المعلومات ؟
دورنا فعلا يرتكز علي توعية المزارعين لان المبادرة مش هتنجح الا بتكاتفنا احنا بنقدم خدمة مجتمعية حقيقية بالتعاون مع قطاع الإرشاد الزراعي بوزارة الزراعة وإستصلاح الاراضي وهدفنا القضاء علي سوسة النخيل للحفاظ علي قوت الفلاحين مش بس كدا بنقدم الدعم الفني مجانا بنستخدم أحدث أجهزة الكشف والعلاج وبنتحمل نصف التكلفة بحيث تكون في متناول المزارعين كل اللي عليك تقدم طلب في الجمعية الزراعية او في أمانة الحزب .
حزب حماة الوطن معا نحميه
