الرئيس السيسي يزور أكاديمية الشرطة ويهنئ الطلاب بمناسبة حلول شهر رمضان الكريم.. ويؤكد: “حماية الوطن أشرف مهمة ممكن يقوم بها أى إنسان”.. و”مرينا بأيام صعبة والحمد لله إحنا بخير وربنا حفظ مصر”
قدم الرئيس عبدالفتاح السيسى، التهنئة لطلاب أكاديمية الشرطة بمناسبة حلول شهر رمضان المعظم.
وقال الرئيس السيسى خلال زيارته وتفقده لمقر الأكاديمية: “لسة المشوار قدامنا، لكن البداية اللى أنا شايفها موفقة جدا وبتمنى ليكم التوفيق.. استمروا وحسنوا دايما من آدائكم.. التعليم والتدريب وكل شىء هدفه يطلع الإنسان فاهم جاهز قادر إن شاء الله إنه يؤدى مهمة كبيرة جدا، وهى حماية الوطن، بلدنا، وهى أشرف مهمة يقوم بها أى إنسان حماية الوطن، فى أى بلد فى العالم أشرف مهمة يقوم بها الإنسان.. بهنيكم وأتمنى لكم كل التوفيق وكل عام وأنتم بخير”.
وأضاف الرئيس السيسي: “وأنت بتدرب وتتعلم تخلي بالك من نفسك وزميلك.. وتبقى واعي وفاهم كل حاجة ماتسيبش حاجة تعدى عليك غير لما تفهمها كويس.. بنهنيكم وانتوا بتتخرجوا من الأكاديمية وبشكركم وبشكر الأكاديمية ووزارة الداخلية، وكل سنة وأنتم طيبين”.
ودعا الرئيس عبدالفتاح السيسي طلاب أكاديمية الشرطة، إلى القراءة والمعرفة، مضيفا: “اوعوا تبطلوا كلام.. بس يبقى موزون قوى بالمعرفة والقراءة والحقائق.. لما تيجيوا تتكلموا بموضوعية وبأساس ممكن الناس تسمعك وتقدر اللى أنت بتقدموا من طرح”.
وعن مراكز الإصلاح والتأهيل، أضاف الرئيس السيسي خلال تفقده مقر أكاديمية الشرطة: “فكرة مراكز الإصلاح إن أحنا كبني آدمين لما نخطئ موصلناش لآخر الدنيا، يعني الواحد ممكن يخطئ طبيعي، وفلسفة العقاب اللى كانت موجودة قبل كده طورنا فيها، مش عاوزين نعاقب الإنسان على قد ما بنحاول نصلحه، جايبنه هنا علشان نحمى المجتمع منه ونحميه من نفسه، طيب ما نعمل برامج لتطويره وتحسين اداؤه ومحاولة تغييره”.
وتابع الرئيس السيسي: “كان عندي طريقين أحاول ادخل تطوير وإصلاح على الواقع الموجود، لقيته مش جيد، علشان كده بقولكم دايما متسيبوش الدنيا على حالها كده، واللى هيفكر هيقدر يوصل بفضل الله سبحانه وتعالى طالما فيه إخلاص وهدف، هيجد ربنا بيوفقه لفكرة كويسة”.
وواصل الرئيس السيسي: “علشان نغير لو تفتكروا لما جينا في المناطق الخطرة والناس كانت فيها بتنام في الشارع، كان عندي مسارين، أحاول أحسن لهم حاجتهم، أو أعمل مكان جديد خالص، اخترت التاني الأغلي والأكثر تكلفة، وقد يكون أكثر جدارة ، طيب أنا عاوز أغير وابني شخصية مختلفة، عاوز أعمل إصلاح حقيقى للإنسان ده، طيب نخش نطور على اللى موجود، قلنا لا نعمل شكل تاني فاتعملت المراكز دي وقلنا نغير حتى في الاسم مش هنسميه سجن تاني وهنسيمه مركز إصلاح وتأهيل، حتى الصورة الذهنية الموجودة في المجتمع عن السجن تتغير، ثم نعمل برامج داخل المراكز من أول مبيت الناس لأكلها وطريقة التعامل معاها، وحيدت العامل البشرى، عاوز تنجح حاول تقلل من التدخل ده، وتقلل احتكاك البشر مع الفكرة علشان تنجح، فقلنا ايه النظام القديم فيه احتكاك مباشر وثقافة اتشكلت وحاجات كتير غريبة اتعملت أنا معرفهاش”.
وذكر الرئيس السيسي: “لما تشوفوا حاجة متنشروهاش بنظرة نقدية.. يعني ايه نظرة نقدية.. يعني مش انتقاد علشان انتقاد، ولكن بنظرة فاحصة شوفوا اللى أحنا عاملينه، ممكن تعمل حاجة وفى الآخر ممكن تضيف فكرة وإضافة في الموضوع في كل عمل هتشتغلوا فيه هيبقى دايما بنتحرك وبنندفع للأمام.. والتطوير مش مرتبط بمرحلة وبس، وأقول ده اللى عملناه نحسن ونقيم ومش عيب أعمل حاجة وبعد ما اعملها بعد تقييم الاقى نفسى محتاج اغير فيها”.
وأكد الرئيس عبدالفتاح السيسى، أن الله سبحانه وتعالي هو الذى حفظ مصر، مضيفا: “اللى حفظ مصر وهيحفظها ويكبرها ربنا سبحانه وتعالي وأنتم والأسر اللى زيكم اللي ربت ولادها وكبرتها وبتقدمها لمصر، ومش بجاملكم.. بيكم واللى انتوا عملتوه والشباب والشابات اللى ربتوهم أحسن تربية وجهزتموهم وتقولوا اتفضل بنقدمهم لمصر.. ربنا يحفظم ويحميكم وتحيا مصر بكم جميعا”.
وجه الرئيس السيسي حديثه لأسر الطلاب خلال زيارته لمقر أكاديمية الشرطة قائلا: “خالوا بالكم من ولادكم ما تأكلوهومش كتير احنا منظمينهم.. وإن شاء الله تسعدوا بيهم وربنا يحفظكم.
وطمأن الرئيس السيسي الحاضرين، قائلا: “بطمنكم على حالنا أحنا بخير… ودايما أقول الكلمة دي لما أقابل أهلى المصريين… بقولهم متخفوش ومتقلقوش من حاجة خالص، أحنا مرينا بأيام صعبة خالص قوي قوي السنين اللى فاتت، وافتكروا فيه تضحيات قد ايه؟، وربنا سبحانه وتعالي هونها علينا ووفقنا بفضله وكرمه علينا، وتضحيات الشباب والجيش والشرطة، وبقت مصر في حتة تانية بفضل الله سبحانه وتعالي”.
وواصل الرئيس السيسي حديثه، قائلا: “اطمنوا علي ولادكم.. وبنهنيكم عليهم شباب وشابات حاجة تفرح .. إحنا جينا بدرى شوية علشان نقولهم كل سنة وانتم طيبين، لكن كل التدريبات حاجة تطمن وتفرح بشكركم مرة تانية بيقولولي انت اللى هتنزلهم او متنزلهومش فانا مش عارف؟ عاوزين تاخدوهم بقول لوزير الداخلية الناس هتيجي ونقول الناس لا ..هما نازلين معاكم وكل سنة وانتم طيبيين.. ربنا يخليكم .. متشكر ربنا يكرمكم ويخليكم متشكر”.
