محمد رحيم ينتقد عدم دعوته لحفل ليلة سعودية مصرية بدار الأوبرا: أشهر وأهم أغاني النجوم من أعمالي
عبر الملحن محمد رحيم عن استيائه من عدم دعوته للحفل الذي أقيم أمس في دار الأوبرا المصرية تحت عنوان «ليلة سعودية مصرية»، خاصة بعد دعوة العديد من الملحنين وصناع الأغنية في مصر.
وكتب محمد رحيم عبر حسابه على موقع «فيسبوك»: «سؤال يا جماعة.. هو ينفع حفلة زي دي تعزموا كل ملحنين وصناع الموسيقى في مصر إلا محمد رحيم طيب إزاي؟؟ ده أشهر وأهم أغاني النجوم دي كلها من أعمالي، يعني شيرين اللى طلعت غنت مشاعر والوتر الحساس وصبري قليل.. كل دي حاجات محمد رحيم، مع احترامي لكل المبدعين اللى موجودين طبعا كلهم فوق راسي وإخواتي».
وقال: «وعمرو دياب اللى قاعد ده أنا واخد معاه جائزه الـميوزيك اوورد العالميه، وطلع غنى غنوتي وهو بيستلم جائزته سنه 2001 (حبيي ولا على باله)، ومعالي وزيرة الثقافة اللي شرفت الحفلة حرفيا وهي سيدة فوق الوصف في الأخلاق وبكن ليها كل حب واحترام هي اللى سهلتلي إجراءات السفر لفرنسا من كام شهر علشان أروح أستلم جائزة العضوية الكاملة الماسية اللى هى آخر حاجه ممكن يحصل عليها ملحن أو مؤلف على مستوى العالم.. وبالمناسبة وأنا هناك جبت معايا كل شهادات التقدير والاحتراف بتاعت زملائي الأصغر مني سنا كلهم اللى كانوا أول مره بيتكرموا وساعتها قلت إن مصر أكبر دولة حصلت على تكريمات السنادي من مؤسسة SACEM.FR باريس في مجال الموسيقى».
وأضاف: «حتى الفنان محمد منير اللى حضوره نور الحفلة، أنا اللى عامله يونس وياحمام وقلبي ميشبهنيش، اللى هما بالمناسبة كلمات الشاعر العظيم عبد الرحمن الأبنودي اللي مكانش بيشتغل غير معايا من جيل الملحنين الشباب إيمانا بموهبتي وحققنا نجاحات كبيرة جدا الحمد لله سوا، وبالمناسبة هو اللي كاتب عيون القلب اللي لحنها الموسيقار الموجي، يعني منير لو كان غنى يونس إمبارح كان هيبقى الخال الأبنودي اتغناله عملين في نفس الحفلة: عيون القلب لحن الموسيقار محمد الموجي، ويونس لحن محمد رحيم».
واستكمل: «طيب ولو اتكلمنا عن الليالي المصرية السعودية والتعاون ما بين أكبر بلدين عربيتين في مجال الفن، طب وهو فيه تعاون أحلى من التعاون اللي حصل بيني وبين الشاعر السعودي الكبير سعود الشربتلي اللي كتب غنوة الوتر الحساس لشيرين وأنا لحنتها وتعبت فيها وبذلت فيها مجهود كبير لحد ما نزلت والحمد لله حرفيا هي النهاردة أغنية عربية عالمية (قولا واحدا) لأن كل جنسيات العالم بيغنوها بالعربي ومواقع التواصل موجوده وتشهد».
واختتم: «معرفش بس حبيت اسأل يعني هو لحد امتى المبدع المجتهد هنفضل نحط من قدره ونقتله معنويا بالشكل ده؟ وهل ده مقصود ولا حدث سهوا، وعلى فكرة أنا بتكلم عموما في المبدأ مش بس الجزء اللي يخصني، معرفش ليه الموقف ده فكرني بغنوه بتاعتي غنتها نانسي عجرم اسمها (في حاجات تتحس ومتتقالش) بس لما تلاقيها مش بتتحس بتضطر تقولها!!!!.. هو الرجل الأكثر نفوذا هيقعدنا في بيتنا جوه بلدنا كمان ولا ايه».
وأعلن الملحن محمد رحيم، تعليقه لكل نشاطاته الفنية لأجل غير مسمى، ولوح باعتزال الفن نهائيا، وذلك من خلال منشور كتبه عبر حسابه على موقع «فيسبوك»، قال فيه: «تعليق كل نشاطاتي الفنية لأجل غير مسمى حتى إشعار آخر، مع احتمالية اعتزال المهنة والسفر خارج البلاد».
يشار إلى أن الملحن محمد رحيم تعاون مع عدد كبير من كبار نجوم الغناء في مصر والوطن العربي ومن بينهم محمد منير، وعمرو دياب، وإليسا، ونانسي عجرم.
