قال الرئيس عبدالفتاح السيسي، إن عشر سنوات من الحرب على الإرهاب أمرٌ له تكلفة.
وأضاف في كلمته خلال الندوة التثقيفية الـ39 للقوات المسلحة بمناسبة الاحتفال بيوم الشهيد، اليوم السبت: “10 سنين قتال لهم تكلفة.. وقبلهم 2011 لها تكلفة.. وبعدها 2013 لها تكلفة.. التكلفة دي أنا مقدرش أشيلها لوحدي ولا الحكومة تقدر تشيلها لوحدها.. لكن كلنا نقدر نشيلها مع بعض”.
وتابع: “وإحنا بنتكلم في النقاط دي محدش يعتبر نفسه بعيد ويوجه لنا الكلام”.
وأشار إلى أن الأوضاع في مصر بدأت في التحسن، متابعًا: “أنا لم أغامر بالمصريين.. ومخدتش قرار أضيع به مصر ولا الحكومة عملت كده.. لم نغامر لا علشان هوى ولا فهم خاطئ ولا تقدير منقوص ودخلنا الناس في الحيطة”.
وتابع: “إحنا مش فاسدين ولا خدنا أموالكم وضيعناها بفساد أو بدلع.. لا محصلش.. لو كنا عملنا فكل حاجة اتعملت على أرض مصر.. ده تسجيل موقف من إنسان إنتوا اختارتوا لتولي المسئولية وأنا قولتلكم تعالوا نتولى المسئولية».
واستكمل: «أنا مقولتش أبدا في موضوع معين أنا لها أنا لها وأخلصكم.. هاتوا كل كلامي من وقت الترشح هتلاقوه مش بيتغير لإن التوصيف مش بيتغير.. دي ظروف إحنا حلها الوحيد.. قلت قبل كده 100 مرة.. بالعمل والصبر.. الصبر لوحده مفيش والعمل لوحده مينفعش.. لازم نشتغل ونصبر”.
ويشهد الرئيس السيسي، اليوم السبت، فعاليات الندوة التثقيفية الـ39 للقوات المسلحة؛ بمناسبة الاحتفال بيوم الشهيد.
ويحضر فعاليات الندوة التثقيفية الدكتور مصطفى مدبولي رئيس مجلس الوزراء، والفريق أول محمد زكي القائد العام للقوات المسلحة وزير الدفاع والإنتاج الحربي وعدد من الوزراء وكبار رجال القوات المسلحة.
وتحتفل مصر يوم 9 مارس من كل عام بذكرى يوم الشهيد، وذلك إحياء لذكرى استشهاد الفريق عبد المنعم رياض، خلال حرب الاستنزاف.
ويوم الشهيد لتكريم أبناء الوطن المخلصين، الذين ضحوا من أجل هذا الوطن الخالد دون انتظار لمقابل أو عائد ليستمر الوطن نابضا بالحياة، ومثمرا بالخير والسلام والنماء للمواطنين كافة ومن أجل حياة أفضل.
