نشر الفنان محمد رمضان، عبر صفحته الرسمية على “فيسبوك”، فيديو يعتذر فيه للشاب الذي صفعه بالقلم، في الفيديو الذي انتشر مؤخرًا على مواقع التواصل الاجتماعي.
وقال رمضان: “الجمهور العدل، الأصيل، الغالي ألف شكر، وربنا مايحرمنيش منكم على وقفتكم معايا، ومساندتكم وقرأت وسمعت قد إيه دافعتم عني، وقد إيه غلطتم الولد الصغير، ولكن الفيديو ده برضه عامله عشان أعترف بالخطأ اللي عملته، وأعتذر لأهل الولد الصغير اللي أنا إيدي اتمدت عليه، وأنا عارف أنه عيل صغير”.
وتابع: “وهو لما غلط في الأول قلعته الكاب، وبصيت في وشه لقيته عيل صغير قلت له اسمك ايه يا حبيبي؟، وسيبته ومشيت ولما رجع غلط تاني لفيت قلت له هات التليفون خباه ومتملكتش نفسي وضربته قلم بسيط، القلم البسيط ده طير له الكاب من على رأسه والنضارة اللي كان لابسها، ولو هنعتبر النموسة اللي وقفت على خدي قلم فأنا أستاهل من النموسة دي خمسة علشان أنا مديت إيدي على عيل صغير، ودي لا رجولة ولا بطولة، ولكن أنا لم أتمالك نفسي، ودي الغلطة اللي أنا طالع أعتذر عنها”.
واختتم رمضان قائلا: “لما أخدت تليفونه ومسحت الفيديو حد قالي اكسر له التليفون عشان ميعملش كده تاني، قولت له طب هو غلط أبوه وأمه ذنبهم ايه يغرموا تمن تليفون تاني خاصة إني عرفت أنه من قرية تانية، وجاي يتفسح في مراسي، قلت لهم روحوه، الأمن قالي هنعمله محضر، قولت لهم يروح بعد أذنكم”.
