أعتقد أن الاستفزاز وصل مداه من القوتين الغاشمتين المتحكمتين تقريبا الآن فى العالم كله،فترامب أمريكا يهدد ويتوعد ويرسل حاملات طائراته لسواحل دول هنا وهناك ويقتل خارج إطار القانون بدعوى القضاء على تجارة المخدرات ومحاربة الإرهاب ويرصد مكافأة لمن يأتى له برئيس دولة مستقلة ذات سيادة وهى فنزويللا!،والقوة الأخرى الغاشمة فى الشرق الأوسط تطيح قتلا وتدميرا فى غزة والضفة ولبنان وسوريا وتعتبر أن مجرد التهديد بالرد تجرؤ ومدعاة لمزيد من العدوان،وكأن لسان حالهم بيقول:
راح نيجى زيارة لبلادكم
والديمقراطية ها نمنحكم
مع كام ألف من المارينز
على كام دبابة تحرركم
من إيه؟بتسأل؟ده صحيح جاهل
ها تخلينى أقول تستاهل
قبل ما اجيلك كنت ف إيه؟هه
مالك ساكت كِدَههُ وذاهل؟
وبترول ده ايه اللى اجى من أجله؟
وادخل كهوف بلد ومجاهله
وادفع ثروة لاجل ما احارب
واضحّى بجندى واحزن أهله؟
ولا بترول ولا يحزنون
أنا كل همى ان انت تكون
فى ديمقراطية وف حرية
لو حتى مات منكوّا مليون !
وبرضُه حبيبى تاخد على راسك
الذنب إيه ؟من غير وحياتك
وكمان بتسأل؟ دا انت رذيل
راح فين يا راجل إحساسك
شفتش أحن منى عليك ؟
ما تفتّح بقى وتشوف بعنيك
وتفرق بين الإرهابى
وبين اللى جايب السعد إليك
وخد كمان طيخ طاخ طوخ
لحد ما تتعب أوى وتدوخ
واياك تفكر ترفع صوتك
راح تلقى ميت قنبلة وصاروخ
واللى ها يغلط يا ويلاه..جوانتانامو بتستناه
من غير قضية ولا محامين.. راح يبقى عبرة لمن عداه
ما احنا القاضى والجلاد
وف بطشنا ما لناش أنداد
نضرب نقتل مين يحاسبنا؟
وبقينا على كل الكون أسياد
لله الأمر من قبل ومن بعد
